Sep 10, 2010

عيدكم في السعودية جنة



عيدكم مبارك وكل عام وأنتم الى الله أقرب

أي تراكم داخلين مدونتي مو غلطانيين في العنوان هههه , أتوقع اختي فطوم تسوي تحديث للصفحة وتطالع أسم المدونة تتأكد إذا أهي مو غلطانة
سمو بالله ودخلوا , مابقول لكم عذروني على الغياب لأن مابغى عذر إلا وقلته ومليتوا من أعذاري هذا إذا بغى أحد يسمع لي
عموماً دخلوا وبقول لكم هالمرة عذروني على الغبره أدري المدونة مغبره وجالسة أنظفها : )
Pen seldom
^_^ تراك واطية على فوطة لا تتوصخين وانتي لابسة ملابس العيد

أيش أقول لكم عن رمضان كيف كان في الغربة عشان بعدها أحكي لكم عن العيد فيه

رمضان هنا مافي روحانية أبـد , ناس تآكل وتشرب في كل مكان واحنا صايمين , حتى الدوام كامل وعلى الفطور بس أنا وزوجي

وين جمعة أهلي وين أحياء ليالي القدر مع الناس , أمي تركب الهريسة الظهر وانا واختي نلف السمبوسة وزوجات أخواني يساعدون أمي في عمل الطبخات والحلى. قبل الأذان بساعة ونص كلنا نجلس ونقرأ قرآن وبعد الصلاة اللي تحط الشوربة واللي تحط المكرونة واللي تنزل الصحون للسفرة وبعد الفطور اللي تغسل واللي تنشف ونسولف ونضحك وبعدها نجتمع ونشرب الشاي مع بعض وطبعاً أهو من أحلى الأوقات عندنا لأنه وقت الرواقة وبعدها يبدأ التخطيط لطلعة السوق ونخطط شلون نقول لخواني نبي نروح وأحنا تونا رايحين ونتحجج بأي شي عشان نروح ونقرر مين اللي بتقول

هنا إذا سألني زوجي تبين تطلعين ؟!

وقلت : أي وأنا مستحيل بقول لا

يقول: عاد هذا السؤال اللي إجابته دائماً متوقعة بــ نعم

قصده لو سألت مره -- مادري إذا كذا يكتبون مره هذا اللي طلع معاي

مره = حرمه = مدام أو حتى آنسة = بنت = دموزيل ^_^ كلهم يتفقون على محبة السوق

إلا فئة قليلة جداً
صراحة احنا كائنات نحب الحرية والتعرف على كل ماهو جديد في السوق --- تكفين لاحد يسمعك

هنا أروح السوق متى ما أبي ووسائل المواصلات متوفرة , إذا جيت بروح السوق أذكر اختي وزوجات اخواني واذكر أخوي أبو أحمد كنت لما أكلمه في التلفون و أقول له اني اروح السوق وقت اللي ابي , يقول لي لو تلفين الدنيا بترجعين للسعودية و أضحك لأنه صادق

صحيح أنا بعيدة عنهم بس ربي يعلم أني أتذكرهم دايماً

إذا جلست من النوم أشوف الساعة إذا كانت عندي 11 تكون في السعودية 1 أقول إذا أمي بتسوي هريسة اليوم أكيد ركبتها

وإذا صارت 1 أقول أختي الحين تلف السمبوسة

وإذا صارت 2ونص أقول الحين زوجة أخوي جات بيتنا

والساعة 4ونص أقول اهلي جلسوا يفطرون وأقول حظهم ^_^

وبعد أقول يا ترى( أم سالم لازالت على العادة القديمة او غيرتها لأن الفترة الأخيرة صارت تسافر في رمضان) هذا الكلام ما راح يفهمونه إلا اميره و

Pen seldom


والساعة 7 أقول أمي وخواتي راحوا بيت أهلي يجتمعون مع خالاتي خصوصاً إذا كان اربعاء او خميس

والساعة 8ونص موعد فطورنا أقول الحين اهلي مداهم يجوعون مرة ثانية وأحنا تونا بنفطر

اتذكر أهلي كثير ومن كثر شوقي لهم أحب أسوي أشياء تذكرني فيهم مثلاً :

أحياناً إذا جيت أسوي شاي وأنا أحرك السكر أحركه بالملعقة عكس عقارب الساعة لأن أمي الغالية كذا تسوي وابتسم لأني أشوف أمي فيني

..................

وأحياناً أضحك ضحكة ولد أخوي حمادي بس للأمانة بيني وبين نفسي ما يسمعني زوجي ههههه الله يذكرك بالخير يا حمود كانت له ضحكة مميزة مادري إذا لازال محتفظ فيها او غيرها بضحكة لاعب يحبه

..................

وإذا جيت أشتري سلسلة أقول لزوجي أبيها لمَاعية-- كلمة أختي الصغيرة شهد لأنها تحب الأشياء اللي تلمع وفي الحقيقة هذي صفة مشتركة بيني وبينها وكنت كل ما شريت لها هدية اول صفة تتوفر فيها أنها تكون تلمع , الله يا كيس هداياها يلمع وكلهم لون واحد وردي

^_^

................


أقول كلمة ( أبد ) و( لاااااا للتعجب ) لأن أبوي الله يحفظه يقولهم *

و في كلمات أقولها وأذكر بنت خالتي وأقول لو كانت موجودة كان قالت قوليها بالفصحى مثل شنطتي كانت بتقول : قولي حقيبتي وقولي حذائي

أما العيد وما ادراك مالعيد هنا , قبل بيوم أقول لحمد بكره نعايد على أي بيت أول ؟!

!!قال لي : اللي تبين

وفي الحقيقة كنت أضحك على نفسي مافي بيوت هنا نعايد عليها ولا شي

اليوم بس عايدت بحمد ولبست ملابس العيد وطلعنا السنتر وكانت هناك بعض مظاهر بهجة بالعيد

كوشكات عربية وأكل عربي وموسيقى عربية وأغلب الزباين أجانب مايدرون شالسالفة

!!

بس الفرحة ما تكمل إلا بأهلنا

عشان كذا ناوية أعيد من جديد إذا نزلت السعودية

و لو اني كاتبه هالبوست قبل كم شهر كان كتبته وانا دمعتي على خدي بس الحين أنا أكتبه وانا مبسوطة واضحك

لأن باقي أقل من شهر على نزلة السعودية وناسة ,عسى الله لا يحرمني منكم يا أهلي وعزوتي في هالدنيا

لغلاة أختي وصديقتي

Pen seldom

قررت أن أُحيي روح مدونتي من جديد بالطريقة التي أحب
خيتي ما ينرد لها طلب

^_^

أشوفكم في بوست جديد الشهر الجاي

قصدي الأسبوع الجاي لا تسمعنا بين سيلدوم : ) إذا ربي أحيانا

Jan 19, 2010

صداعي عنيد


من سنتين أنتهيت من دراستي في الكلية وذلك يعني أنه قد مر وقت طويل لإمساكي بالكتب

والمذاكرة بجد ..

و الآن أنا أعود من جديد لأكون طالبة في معهد لتعليم اللغة الإنغليزية وهذا كان من ثلاثة أشهر , أعتدت على
الأمر لكن هذا الأسبوع وبالتحديد اليوم بدأت في مستوى جديد عالي نسبياً ولدي كلاس آيلتس بعد الظهر ايضاً بدأته مؤخراً وهذا يعني أن كم المعلومات الجديدة أصبح أكبر فجأة !! وهذا ما سبب صدمة لعقلي!!
:)
في نهاية الدوام بالتحديد في الساعة الثالثة عصراً أحسست بصداااااع رهيب وكأن رأسي سينفجر ربما من كم المعلومات التي لم اعتد عليها لذلك قررت أن أعود لشقتي وأنام لكن محاولاتي أن أحضى ولو بساعة راحة باءت بالفشل ولأن صداعي عنيد لم يقبل بالنوم ولا حتى بالبندول لكي يزول
لا أعلم لما مزاجي اليوم ايضاً مغلوب مما يشعرني بالضيق ورغبة عارمه بالبكاء .. لكن
"أينك يا حضن أمي؟! "
في كل مرة أشعر بالضيق أتذكر أمي الحبيبة وأغبط من هم حولها لأنهم يستطيعون رؤيتها وتقبيلها
ليتني بقربك أمي لأحضى بحضنك الدافئ وأسمع دعوات الرضا والتوفيق منكِ وأقبل رأسكِ ويداكِ حتى أكتفي ولن أكتفي..
أمي الحبية .. كم أحبك
الآن أصبحت أفضل حالاً بعد أن غادرني الصداع ولكن بعد أن أخذ ساعات من وقتي وانا أتألم في انتظاره أن يزول
أراني أعود لكِ مدونتي , ربما لي أكثر من عودة لأخبركِ عن جديدي فأنا مشتاقة لكِ
: )

Jan 13, 2010

تاج السنة الجديدة

العالم من زمان تقول
Happy new year
وأنا توني
اتمنى تكون سنة خير على الجميع
وشكراً لمن أهدتني التاج عزيزتي فطومة : )

اسمك واسم مدونتك ؟
اسمي : Marym
اسم مدونتي: The Beautiful Heart
احب الالوان؟ الايام ؟ الارقام ؟
أحب الأزرق ولون الطبيعة الأخضر يشعرني بالراحه
من الأيام يوم الجمعه لسببين لأنه يوم مبارك ولأنه بداية الويك آند
الرقم : 5 وحكايتي معه تطول بدأت من يوم وسنة مولدي وحتى الآن في رقم
.الكلاس اللي ادرس فيه
برجك وتاريخ ميلادك ؟
برجي الجوزاء
تاريخ ميلادي 25/5/1985
ما أهم مميزاتك؟ وأهم عيوبك؟ وماهى الصفه التى تتمنى أن تتوفر فيك؟
مميزاتي: أكون صداقات بسرعة
عيوبي : كثيرة
أحب أسوف واستبق الأحداث دائماً
وإذا عصبت أصير شينة ما أكلم أحد
صفة أتمناها لنفسي :
حسن الظن دائماً
مكانك المفضل؟
في شقتي قمة راحتي
هوايتك المفضلة :
No thing!
maybe shopping!
ما المقولة اللي تؤمن بها ؟
ما فاز باللذات إلا الجسور
الله يذكر أخوي بو أحمد بالخير من قال لي هالمقولة واهي ما تفارق ذهني
أجمل هدية قدمت لك من مين ؟
من أمي الله يحفظها
أسعد يوم في حياتك ؟ و أتعس يوم في حياتك ؟
أسعد يوم في حياتي كان يوم زواجي
وأتعس يوم في حياتي , الله يبعد عنا وعنكم التعاسه
موقف طريف لا ينسى من ذاكرتك ؟
المواقف الطريفه ما تنتهي
بس في موقف كل ما ذكرته ضحكت على نفسي
أول ما سافرنا ما كانت عندي خلفيه عن البلد والأنظمه
دخلنا سوبر ماركت أنا و زوجي عشان نشتري نواقص للشقة وكان زحمة
واحنا نحاسب كان قدامي وحده شاريه اغراض وشارية تحفه جميلة مكتوب عليها
Welcome
وحاسبت وكانت اهي اللي تحط الأغراض في الأكياس ونست تآخذ التحفه , قلت مسكينه
وأخذت التحفه وبعطيها اياها إلا اللي تحاسب كانت هنديه كانت مندهشه بس مادري ليش
وتطالع فيني كأنها تقول هالبنيه فيها شي وانا اقول لها مالتها ما أخذتها وزوجي يقول لي اشفيك , قلت له قال: هذي ما يبيعونها هذي يحطونها فاصل بين أغراض الزباين إذا كان زحمه
(انا خلاص تفشلت , من الفشيلة صرت ما شوف هههههههه ( هذ اللقافه و ماتسوي
معاك ثلاث وردات لمين تهديهم ؟
لأمي الحبيببة وردتي الأولى
لوالدي الحبيب وردتي الثانية
لزوجي الغالي وردتي الثالثة
معاك ثلاث رصاصات على مين تطلقهم ؟
عطوني شي أقوى هههههههه
لكل من تسول له نفسه إذاء نفس بريئة
رأيك في الحب ؟ و لمن تقول أجمل كلمة حب ؟
الحب مرسى
أجمل كلمة حب أقولها لكل من يحب مريم
هل من السهل أن تمثل الحب لشخص يحبك لعدم جرح مشاعره؟
صعبه تمثل تحب لأنك ما راح تنجح
المرأة فى نظر الرجل ........ أكمل ؟
رفيقة عمره , أمه وأخته وصديقته وظله
الرجل فى نظر المرأة......... أكمل؟
الأمان والسند , الأب والأخ والصديق ورفيق العمر وطفلها المدلل
ماهو أسعد خبر سمعته هذا العام؟ وماهو اتعس خبر؟
.لسى العام في أوله